वाशिम तालुक्यात कलापथकांनी दिली समाज कल्याण योजनांची माहिती

वाशिम तालुक्यात कलापथकांनी दिली

समाज कल्याण योजनांची माहिती

       वाशिम, दि. 17 (जिमाका) : शासनाच्या अनेक लोककल्याणकारी योजना आहे. लाभार्थ्यांना योजनांची माहिती मिळाली तर ते निश्चितच योजनांचा लाभ घेण्यासाठी पुढे येतील. योजनांच्या लाभामुळे त्यांची आर्थिक व सामाजिक स्थिती सुधारण्यास मदत होईल. लाभार्थ्यांनी योजनांची माहिती जाणून घेवून योजनांचा लाभ घ्यावा. या उद्देशाने समाज कल्याण विभागाच्या महत्वपूर्ण निवडक योजनांची माहिती जिल्हा माहिती कार्यालय, वाशिमच्या वतीने कलापथकाच्या माध्यमातून ग्रामस्थांचे व लाभार्थ्यांचे प्रबोधन करुन मनोरंजनातून देण्यात येत आहे. अशाच प्रकारे वाशिम तालुक्यातील निवडक काही गावात कलापथक कार्यक्रमाच्या माध्यमातून योजनांची माहिती दिली जात आहे.

         वाशिम तालुक्यातील अडगांव (खु.), कोकलगांव, अंजखेडा, बोराळा (हिस्से), बाभुळगांव, फाळेगांव, सोंडा, ढिल्ली, आसोला व भटउमरा या गावी भरारी सांस्कृतीक व ग्रामीण विकास बहु. संस्थेच्या कलापथक प्रमुख कलावंत विद्या भगत व निरंजन भगत व त्यांच्या सहकारी कलावंतांनी ग्रामस्थांचे व लाभार्थ्यांचे मनोरंजन करुन प्रबोधनातून समाज कल्याण विभागाच्या योजनांची माहिती दिली. यावेळी अडगांव येथील सरपंच सुरेश हजारे, उपसरपंच सुनिल हजारे, कोकलगांव सरपंच विठ्ठलराव काळबांडे, बोराळा (हिस्से) सरपंच मीरा उंडाळ, बाभुळगांव सरपंच लक्ष्मीबाई ढोबळे, फाळेगांव सरपंच ज्योती कोरडे, सोंडा सरपंच नवनाथ वाबळे व ग्रामसेवक श्री. घोडे यांची कलापथक कार्यक्रमाला प्रामुख्याने उपस्थिती होती.

          तर मानव बहु, संस्थेचे कलापथक प्रमुख प्रज्ञानंद भगत व त्यांच्या सहकारी कलावंतांनी धानोरा (बु.) एकांबा, जुमडा, जांभरुण (महाली), तोरनाळा, किनखेडा, गोंडेगांव, बोराळा (हिस्से), घोटा व शिरपूटी येथे कार्यक्रम सादर केले. गोंडेगांव येथील कार्यक्रमाला ह.भ.प. श्रीराम महाराज बेंद्रे, सामाजिक कार्यकर्ते भास्कर इंगळे, भिमराव खिल्लारे, किनखेडा येथील कार्यक्रमाला माजी पोलीस पाटील महादेव लांडकर, दामोधर भगत, प्रदिप गायकवाड, उमेश निर्मळे, वंदना गायकवाड, राजू लांडकर यांची प्रामुख्याने उपस्थिती होती.

           कलापथकाच्या कलावंतांनी ग्रामस्थांना व लाभार्थ्यांना समाज कल्याण विभागाच्या मार्जिन मनी योजना, कर्मवीर दादासाहेब गायकवाड सबळीकरण व स्वाभिमान योजना, भारतरत्न डॉ. बाबासाहेब आंबेडकर स्वाधार योजना, कन्यादान योजना, अनुसूचित जाती जमाती अत्याचार प्रतिबंध कायदा, मुला-मुलींसाठी शासकीय वसतीगृह योजना, शेळी गट वाटप योजना, अनुसूचित जाती व नवबौध्द घटकांच्या बचत गटांना मिनी ट्रॅक्टर व उपसाधनांचा पुरवठा करणे, अनुसूचित जाती व नवबौध्द मुला-मुलींसाठी निवासी शाळा, अनुसूचित जातीच्या विद्यार्थ्यांसाठी परदेशात शिक्षणासाठी शिष्यवृत्ती, आंतरजातीय विवाहास प्रोत्साहनपर आर्थिक सहाय्य, राजर्षी छत्रपती शाहू महाराज गुणवत्ता पुरस्कार, डॉ. बाबासाहेब आंबेडकर कृषी स्वावलंबन योजना व दिव्यांग विद्यार्थ्यांना शिष्यवृत्ती योजना या निवडक व महत्वपूर्ण योजनांची माहिती देण्यात आली. यावेळी कलापथक प्रमुख विद्या भगत यांनी कार्यक्रमाला उपस्थित संबंधित गावचे सरपंच व उपसरपंच यांना समर्पण या समाज कल्याण विभागाच्या योजनांवर आधारीत घडिपुस्तिकेचे वाटप केले. कार्यक्रमाला ग्रामस्थांची व लाभार्थ्यांची मोठया संख्येने उपस्थिती होती.

*******