पहिली, दुसरीसाठी अनुसूचित जमातीच्या विद्यार्थ्यांना मिळणार नामांकित इंग्रजी शाळेत प्रवेश

पहिली, दुसरीसाठी अनुसूचित जमातीच्या विद्यार्थ्यांना मिळणार नामांकित इंग्रजी शाळेत प्रवेश

३० एप्रिलपर्यंत अर्ज करण्याचे आवाहन 

वाशिम (जिमाका): शहरातील इंग्रजी माध्यमांच्या नामांकित निवासी शाळेत इयत्ता पहिली आणि इयत्ता दुसरीत सन २०२४-२०२५ या सत्रात प्रवेशासाठी अनुसूचित जमातीच्या विद्यार्थांकडून अर्ज मागविण्यात येत आहे. प्रवेश अर्ज विनामुल्य प्रकल्प अधिकारी, एकात्मिक आदिवासी विकास प्रकल्प कार्यालय अकोला तसेच नजीकच्या शासकीय व अनुदानित आश्रमशाळेत मिळतील. प्रवेश अर्ज सादर करण्याची अंतिम मुदत ३० एप्रिल देण्यात आली आहे.

इयत्ता पहिली आणि इयत्ता दुसरीमध्ये प्रवेश घेण्यासाठी अटी व शर्ती आहेत. त्यानुसार या योजनेचा लाभ घेणारा विद्यार्थी हा अनुसूचित जमातीचा असावा. पालकाने विद्यार्थ्याच्या नावे सक्षम अधिकाऱ्याने दिलेल्या अनुसूचित जमातीच्या दाखल्याची साक्षांकित प्रत सादर करावी. जर विद्यार्थी हा दारिद्रय रेषेखालील असेल तर यादीतील अनुक्रमांक नमुद करण्यात यावा. पालकाच्या वार्षिक उत्पन्नाची अट कमाल मर्यादा एक लाख रुपयांच्या आत असणे आवश्यक आहे. इयत्ता पहिलीत प्रवेश घेणाऱ्या विद्यार्थ्यांचे वय सहा वर्ष पूर्ण असावे. जन्म तारखेचा पुरावा म्हणून ग्रामसेवकाचा दाखला ग्राह्य धरण्यात येईल. या योजनेचा लाभ घेवू इच्छिणाऱ्या विद्यार्थ्यांच्या पालकांनी प्रवेश अर्जासोबत संमतीपत्र व दोन पासपोर्ट फोटो जोडावे. 

आदिम जमातीच्या विद्यार्थ्यांची तसेच विधवा किंवा घटस्फोटीत, निराधार, परितक्त्या व दारिद्रय रेषेखालील कुटूंबातील अनुसूचित जमातीच्या विद्यार्थ्यांची प्राधान्याने निवड करण्यात येईल. विद्यार्थ्यांचे पालक शासकीय किंवा निमशासकीय नोकरदार नसल्याचा पुरावा म्हणून ग्रामसेवकाचा दाखला ग्राह्य धरण्यात येईल. या योजनेचा लाभ घेवू इच्छिणाऱ्या मुलांच्या पालकाकडून संमतीपत्र घेण्यात येईल. इयत्ता दुसरीसाठी शिकत असलेल्या शाळेतील मुख्याध्यापकाचे प्रमाणपत्र, आधारकार्डची झेरॉक्स प्रत विद्यार्थ्याने अर्जासोबत जोडावी. अपूर्ण कागदपत्रे असल्यास तसेच खोटी माहिती सादर केल्यास प्रवेश रद्द करण्यात येईल, असे प्रकल्प अधिकारी एकात्मिक आदिवासी विकास प्रकल्प, अकोला यांनी कळविले आहे.

०००