समाज कल्याण विभागाच्या विभागीयस्तरीय कला व क्रीडा स्पर्धा उत्साहात संपन्न

समाज कल्याण विभागाच्या

विभागीयस्तरीय कला व क्रीडा स्पर्धा उत्साहात संपन्न

       वाशिम, दि. 30 (जिमाका) : समाज कल्याण विभागाच्या विभागीयस्तरीय कला व क्रीडा स्पर्धेचे जिल्हा क्रीडा संकुल वाशिम येथे 28 जानेवारी 2023 रोजी अमरावती विभागाचे  समाज कल्याण प्रादेशिक उपायुक्त श्री सुनिल वारे यांच्या अध्यक्षतेखाली आयोजन करण्यात आले. प्रमुख पाहुणे म्हणून यवतमाळ समाज कल्याणचे सहायक आयुक्त भाऊराव चव्हाण, अमरावती समाज कल्याण आयुक्त माया केदार, बुलडाणा समाज कल्याण सहायक आयुक्त डॉ अनिता राठोड, बुलढाणा व अकोला समाज कल्याण आयुक्त राजेंद्र जाधव व समाज कल्याण अधिकारी यांची उपस्थिती होती.

          कार्यक्रमाचे संयोजक समाज कल्याणचे सहायक आयुक्त मारोती वाठ होते. प्रारंभी मान्यवरांच्या हस्ते महात्मा ज्योतिबा फुले, राजर्षी शाहू महाराज व डॉ. बाबासाहेब आंबेडकर यांच्या प्रतिमेचे पूजन करून दीप प्रज्वलन करण्यात आले. यावेळी सुरकुंडी येथील शासकीय निवासी शाळेचे मुख्याध्यापक ए.आर.भगत यांनी कला व क्रीडा अविष्कार स्पर्धाबाबत प्रास्ताविक केले.

           श्री.वारे आपल्या अध्यक्षीय मार्गदर्शनातून बोलताना म्हणाले, अमरावती समाज कल्याण विभागांतर्गत 26 अनुसूचित जाती व नवबौध्द घटकांच्या मुला-मुलींच्या शासकीय निवासी शाळा आहेत. या शाळांमधील विद्यार्थ्यांचा सर्वांगीण विकास करण्यासाठी विभागांतर्गत नवनविन शैक्षणिक उपक्रम राबविले जात आहे. त्याअंतर्गत समाज कल्याण विभागाचे आयुक्त डॉ. प्रशांत नारनवरे यांच्या संकल्पनेतुन सन 2022-23 या शैक्षणिक वर्षापासुन विद्यार्थ्यांच्या कलागुणांना वाव मिळावा तसेच क्रीडा नैपुण्य विकसीत होण्यासाठी कला व क्रीडा अविष्कार स्पर्धेचे आयोजन विभागाच्या वत्तीने प्रथमच करण्यात आल्याचे सांगितले.

          कला व क्रीडा स्पर्धेअंतर्गत विद्यार्थ्यांसाठी भूमिका-अभिनय व लोकनृत्य स्पर्धा तसेच 100 व 200 मीटर धावणे, रीले- 4 x 100 मी., लांब उडी, थाळीफेक, रस्सीखेच व खो-खो या क्रीडा स्पर्धेचे आयोजन करण्यात आले.अमरावती, अकोला, यवतमाळ, बुलढाणा व वाशिम जिल्ह्यातील सर्व निवासी शाळांमधून जिल्हास्तरीय स्पर्धेतील विजयी स्पर्धक यामध्ये सहभागी झाले होते. विभागीयस्तरावर समाज कल्याण प्रादेशिक उपायुक्त यांच्यावतीने विभागीय स्तरावरील स्पर्धा वाशिम येथे समाज कल्याण कार्यालय, वाशिम यांच्यावतीने आयोजित करण्यात आले. त्यासाठी प्रादेशिक उपायुक्त, समाज कल्याण विभाग अमरावती यांच्या मार्गदर्शनाखाली विविध समित्या गठीत करण्यात येवून समाज कल्याण विभागात प्रथमच कला व क्रीडा स्पर्धेचे आयोजन करण्यात आल्याने विद्यार्थी व पालकांनी या उपक्रमाचे स्वागत केले.

           समाज कल्याणचे आयुक्त श्री. नारनवरे यांच्या संकल्पनेतुन विभागात नवनविन उपक्रम राबविण्यात येत आहे.

          विद्यार्थ्यांच्या सर्वांगीण विकासाच्यादृष्टिने त्यांच्या शैक्षणिक विकासासोबतच शारिरीक व मानसिक विकास साध्य करण्याकरीता यावर्षी प्रथमच कला व क्रीडा अविष्कार महोत्सवाचे आयोजन करण्यात आले आहे. विभागीयस्तरावरील या स्पर्धेमध्ये जवळपास 750 विद्यार्थी सहभागी झाले. यामुळे खाजगी शाळा प्रमाणेच समाज कल्याण विभागातील विद्यार्थ्यांच्या कलागुणांना वाव मिळत असून या उपक्रमाने विद्यार्थ्यांमध्ये उत्साहाचे वातावरण निर्माण झाले असल्याचे श्री. वारे यांनी सांगितले.

         विभागीयस्तरावरील आयोजित विविध क्रीडा स्पर्धा व सांस्कृतिक कार्यक्रमामध्ये भाग घेतलेल्या विद्यार्थी /विद्यार्थीनी मधून प्रथम द्वितीय तृतीय पात्र ठरलेल्या विद्यार्थी/विद्यार्थिनी यांना स्मृतीचिन्ह व प्रमाणपत्राचे मान्यवरांच्या हस्ते वाटप करण्यात आले. कार्यक्रमाकरीता अमरावती विभागातील सर्व शासकीय निवासी शाळेतील मुख्याध्यापक, शिक्षक, प्रादेशिक उपाआयुक्त, समाज कल्याण कार्यालयातील कर्मचारी वर्ग, शासकीय वसतिगृहातील गृहपाल, अमरावती विभागातील क्षेत्रीय कार्यालयातील सर्व कर्मचारी तसेच समाजकार्य महाविद्यालयातील प्राचार्य, शिक्षक व शिक्षकेत्तर कर्मचारी, विद्यार्थी व विद्यार्थीनी, ब्रिक्स प्रा. लि. व क्रीस्टल कंपनीचे कर्मचारी उपस्थित होते.

        कार्यक्रमाचे संचालन प्रा.हिवसे यांनी तर उपस्थितांचे आभार समाज कल्याण निरीक्षक संध्या राठोड यांनी मानले.

*******