निवडणूक खर्चाची माहिती विहित कालमर्यादेत सादर करा - जिल्हाधिकारी हृषीकेश मोडक

विधानसभा सार्वत्रिक निवडणूक २०१९

·        राजकीय पक्ष प्रतिनिधींची बैठक

·        निवडणूक विषयक विविध बाबींच्या दरनिश्चिती

वाशिम, दि. २४ : भारत निवडणूक आयोगाने विधानसभा सार्वत्रिक निवडणूक कार्यक्रम जाहीर केला असून या निवडणुकीमध्ये प्रत्येक उमेदवाराला २८ लक्ष रुपयेपर्यंत खर्च करण्याची मुभा आहे. सर्व उमेदवारांनी या मर्यादेतच निवडणूक खर्च करावा, तसेच निवडणूक खर्चाची माहिती विहित नमुन्यात व निश्चित कालमर्यादेत निवडणूक यंत्रणेला सादर करावी, असे आवाहन जिल्हाधिकारी तथा जिल्हा निवडणूक अधिकारी हृषीकेश मोडक यांनी आज केले. जिल्हाधिकारी कार्यालयाच्या वाकाटक सभागृहात झालेल्या राजकीय पक्षांच्या प्रतिनिधींच्या स्थायी समितीच्या सभेत ते बोलत होते.

निवडणूक विषयक विविध बाबींच्या दरनिश्चितीसाठी व इतर विषयांवर चर्चा करण्यासाठी ही सभा आयोजित करण्यात आली होती. यावेळी अपर जिल्हाधिकारी तथा आदर्श आचारसंहिता समितीचे नोडल अधिकारी दिनेशचंद्र वानखडे, उपजिल्हा निवडणूक अधिकारी संदीप महाजन, वाशिम विधानसभा मतदारसंघाचे निवडणूक निर्णय अधिकारी जयंत देशपांडे, निवडणूक खर्च संनियंत्रण समितीचे नोडल अधिकारी तथा जिल्हा कोषागार अधिकारी चंद्रकांत खारोडे, जिल्हाधिकारी कार्यालयाचे अंतर्गत लेखा परीक्षक युसुफ शेख, अपर कोषागार अधिकारी शाम गाभणे यांच्यासह विविध राजकीय पक्षांचे प्रतिनिधी उपस्थित होते.

जिल्हाधिकारी श्री. मोडक म्हणाले, निवडणूक कालावधीत उमेदवारांकडून होणाऱ्या प्रत्येक खर्चाची नोंद त्यांच्या खर्च नोंदवहीत होणे आवश्यक आहे. जिल्हा निवडणूक यंत्रणेकडून सुध्दा प्रत्येक उमेदवाराच्या खर्चाची छाया नोंदवही (शॅडो रजिस्टर) तयार करण्यात येणार आहे. त्यामुळे या दोन्ही नोंदींमध्ये तफावत येऊ नये, यासाठी उमेदवारांनी आपल्या सर्व खर्चाच्या नोंदी अचूकपणे निवडणूक यंत्रणेला सादर कराव्यात. निवडणूक खर्च नोंदणीविषयी निवडणूक निर्णय अधिकारी स्तरावर राजकीय पक्ष प्रतिनिधींची कार्यशाळा आयोजित करण्यात येईल. यामध्ये खर्च पुस्तक कसे भरावे, खर्चाचे हिशोब कशाप्रकारे सादर करावेत याची माहिती देण्यात येईल. त्यानुसार सर्व राजकीय पक्ष व उमेदवारांनी खर्चाची माहिती वेळोवेळी निवडणूक यंत्रणेला सादर करावी, असे त्यांनी सांगितले.

अपर जिल्हाधिकारी श्री. वानखडे यांनी आदर्श आचारसंहिता कालावधीत काय करावे व काय करू नये, याविषयी माहिती दिली. तसेच सर्व राजकीय पक्ष व उमेदवारांनी आदर्श आचारसंहितेचे पालन करून निवडणूक पारदर्शक व भयमुक्त वातावरणात पार पाडण्यासाठी सहकार्य करण्याचे आवाहन केले.

जिल्हा निवडणूक यंत्रणेमार्फत तयार करण्यात येणाऱ्या खर्च विषयक छाया नोंद वहीत जिल्ह्यात सुसूत्रता रहावी, याकरिता निवडणूक काळात वापरल्या जाणाऱ्या वस्तू व साहित्याचे जिल्हास्तरावर निश्चित करण्यात आले आहेत.  जिल्ह्यातील तिन्ही विधानसभा मतदारसंघांना लागू असणार असून हे दर यावेळी सर्व राजकीय पक्षांना उपलब्ध करून देण्यात आले.

*****