🌾 दुष्काळसदृश्य पीक परिस्थितीची विभागीय आयुक्तांकडून प्रत्यक्ष पाहणी📍 पिकांवर झालेल्या परिणामांचे वस्तुनिष्ठ मूल्यांकन करा – विभागीय आयुक्त नयना गुंडे

🌾 दुष्काळसदृश्य पीक परिस्थितीची विभागीय आयुक्तांकडून प्रत्यक्ष पाहणी

📍 पिकांवर झालेल्या परिणामांचे वस्तुनिष्ठ मूल्यांकन करा – विभागीय आयुक्त नयना गुंडे

वाशिम, दि. १४ ऑक्टोबर (जिमाका) : दुष्काळसदृश्य परिस्थितीत पिकांवर झालेल्या परिणामांचे वस्तुनिष्ठ मूल्यांकन करून पीक परिस्थितीची अचूक आणि सुस्पष्ट माहिती संकलित करावी, असे निर्देश अमरावती विभागाच्या विभागीय आयुक्त नयना गुंडे यांनी आज येथे दिले.

विभागीय आयुक्तांनी मंगळवारी (दि. १४ ऑक्टोबर) वाशिम जिल्ह्यातील विविध तालुक्यांना भेट देऊन शेतातील सोयाबीन, कापूस आणि हळद चिया आदी पिकांची प्रत्यक्ष पाहणी केली. यामध्ये कारंजा तालुक्यातील खेर्डा, मंगरूळपीर तालुक्यातील घोटा आणि वाशिम तालुक्यातील सूपखेला येथील शेतशिवारांचा समावेश होता.

या पाहणी दौऱ्यास जिल्हाधिकारी योगेश कुंभेजकर, जिल्हा अधीक्षक कृषी अधिकारी आरिफ शहा, उपविभागीय अधिकारी वैशाली देवकर, तहसीलदार निलेश पळसकर, तालुका कृषी अधिकारी अतुल जावळे आदींची उपस्थिती होती.

🌱 शेतकऱ्यांशी साधला थेट संवाद

पाहणी दौऱ्यादरम्यान विभागीय आयुक्त नयना गुंडे यांनी स्थानिक शेतकरी बांधवांशी प्रत्यक्ष संवाद साधला. दुष्काळसदृश्य परिस्थितीमुळे पिकांचे झालेले नुकसान, पाण्याची उपलब्धता आणि पीक वाढीवर झालेला परिणाम याविषयी त्यांनी शेतकऱ्यांकडून थेट माहिती जाणून घेतली.

या पाहणीदरम्यान जिल्हाधिकारी योगेश कुंभेजकर आणि जिल्हा अधीक्षक कृषी अधिकारी आरिफ शहा यांनी जिल्ह्यातील सद्यस्थितीतील पीक परिस्थिती, पावसाची तूट आणि प्रशासनातर्फे राबवण्यात येत असलेल्या उपायांची सविस्तर माहिती विभागीय आयुक्तांना दिली.

यावेळी संबंधित मंडळ अधिकारी, ग्राम महसूल अधिकारी, कृषी सहायक आणि ग्रामपंचायत अधिकारीही उपस्थित होते.

०००

#दुष्काळसदृश्यपरिस्थिती 

#दुष्काळनिवारण