🌾 दुष्काळसदृश परिस्थिती निवारणासाठी सर्वंकष नियोजन करा!विभागीय आयुक्त नयना गुंडे यांचे निर्देश; पाणीटंचाई, चारा उपलब्धता आणि रोजगारनिर्मितीचा घेतला आढावा

🌾 दुष्काळसदृश परिस्थिती निवारणासाठी सर्वंकष नियोजन करा!

विभागीय आयुक्त नयना गुंडे यांचे निर्देश; पाणीटंचाई, चारा उपलब्धता आणि रोजगारनिर्मितीचा घेतला आढावा

📍 वाशिम, दि. १४ ऑक्टोबर (जिमाका)

जिल्ह्यातील संभाव्य पाणीटंचाई आणि चारा टंचाईचा सामना करण्यासाठी संबंधित यंत्रणांनी समन्वयाने काम करून उपाययोजनांची वेळेत अंमलबजावणी करावी. पिण्याचे पाणी आणि पशुधनासाठी चारा उपलब्ध करून देण्यासोबतच ग्रामीण भागात रोजगारनिर्मितीला चालना देण्यासाठी सर्वंकष नियोजन करावे, असे निर्देश अमरावती विभागाच्या विभागीय आयुक्त नयना गुंडे यांनी दिले. जिल्हाधिकारी कार्यालयातील काटेपूर्णा दालनात आयोजित आढावा सभेत त्या बोलत होत्या.

बैठकीला जिल्हाधिकारी योगेश कुंभेजकर, मुख्य कार्यकारी अधिकारी अर्पित चौहान, अपर आयुक्त संजय जाधव, निवासी उपजिल्हाधिकारी विश्वनाथ घुगे, उपविभागीय अधिकारी वैशाली देवकर, आपत्ती व्यवस्थापन अधिकारी शाहू भगत आदींची प्रमुख उपस्थिती होती.

💧 पाणीटंचाई निवारणासाठी पर्यायी स्रोतांची व्यवस्था

वाशिम जिल्ह्यातील पाणीपुरवठा आणि चारा नियोजनाचा आढावा घेताना गावनिहाय गरज लक्षात घेऊन आवश्यक उपाययोजनांना प्राधान्य देण्याच्या सूचना विभागीय आयुक्तांनी दिल्या.

संभाव्य टंचाईग्रस्त गावांमध्ये खासगी विहिरींचे अधिग्रहण, आवश्यकतेनुसार टँकरद्वारे पाणीपुरवठा, नवीन बोअरवेल, विहिरींचे खोलीकरण तसेच नळ पाणीपुरवठा योजना व हातपंपांची दुरुस्ती करावी. प्रलंबित वीज जोडण्या तातडीने पूर्ण करून पर्यायी जलस्रोत उपलब्ध ठेवावेत, असे निर्देश त्यांनी दिले.

🌱 रब्बी हंगामात चारा उत्पादन वाढवा

वैरण बियाण्यांचे वाटप, ज्वारी व बाजरीसारख्या चारा पिकांची लागवड आणि चाऱ्याची योग्य साठवणूक यावर भर द्यावा. गरजेनुसार चारा डेपो व चारा छावण्यांचे नियोजन करावे. वनक्षेत्रातील कुरणांमधील चारा पशुधनासाठी उपलब्ध करून देण्यासाठी वन विभाग आणि पशुसंवर्धन विभागाने समन्वय साधावा, असेही त्यांनी सांगितले.

👩‍🌾 व्हीबी-जी रामजी योजनेतून रोजगारनिर्मिती

व्हीबी-जी रामजी योजनेअंतर्गत ई-क्लास जमिनीवर चारा लागवडीची कामे प्रस्तावित करावीत. यातून ग्रामीण भागात रोजगारनिर्मिती आणि पशुधनासाठी चाऱ्याची उपलब्धता वाढविण्यावर भर द्यावा. यासाठी पशुसंवर्धन विभागाने आवश्यक प्रस्ताव सादर करावेत, असे निर्देश विभागीय आयुक्त नयना गुंडे यांनी दिले.

बैठकीला सर्व संबंधित विभाग प्रमुख उपस्थित होते.

#दुष्काळसदृशपरिस्थिती 

#दुष्काळनिवारण