📍 यवतमाळदुष्काळी परिस्थितीच्या पार्श्वभूमीवर केंद्र सरकारच्या आंतरमंत्रालयीन केंद्रीय पथकाने जिल्ह्यातील दुष्काळग्रस्त भागांचा दौरा केला.

October 10, 2026

📍 यवतमाळ

दुष्काळी परिस्थितीच्या पार्श्वभूमीवर केंद्र सरकारच्या आंतरमंत्रालयीन केंद्रीय पथकाने जिल्ह्यातील दुष्काळग्रस्त भागांचा दौरा केला. पथकाने बांधावर जाऊन कापूस, सोयाबीन आणि तूर पिकांची प्रत्यक्ष पाहणी व मूल्यांकन केले. तसेच दुष्काळाचे चटके सोसणाऱ्या शेतकऱ्यांच्या व्यथा, अडचणी आणि मागण्या जाणून घेत त्यांना संकटाशी दोन हात करण्यासाठी धीर दिला.

पथकात केंद्रीय जलसंपदा विभागाच्या संनियंत्रण संचालनालयाचे संचालक तथा पथकप्रमुख अर्जेश कुमार मधोक, वित्त मंत्रालयाच्या व्यय विभागाचे सहसंचालक महेश कुमार, कृषी व शेतकरी कल्याण विभागाच्या अवर सचिव सीमा राणी आणि ग्रामीण विकास विभागाचे अवर सचिव संजय मीना यांचा समावेश होता.

पथकाने मडकोना व लासिना, तसेच नेर तालुक्यातील लोणी, मांडवगड, वटफळी आणि दोडकी या गावांना भेट दिली. यावेळी कापूस, सोयाबीन आणि तूर पिकांची पाहणी करून पिकांची सद्यस्थिती, पावसातील खंडामुळे झालेली हानी आणि शेतीसमोरील अडचणींची माहिती घेतली. शेतकऱ्यांशी थेट संवाद साधून त्यांच्या समस्या व अपेक्षा जाणून घेतल्या. शेतकऱ्यांना मदतीच्या दृष्टीने केंद्र सरकार सकारात्मक असल्याचा विश्वासही या दौऱ्यातून व्यक्त करण्यात आला.

पथकाने यवतमाळ शहरातील श्री गौरक्षण संस्थेला भेट देऊन गोशाळेची पाहणी केली. यावेळी गायींची संख्या, उपलब्ध चारा आणि पशुधनासाठी राज्य शासनाकडून करण्यात येत असलेल्या उपाययोजनांची माहिती घेतली.

किटा कापरा येथील लघुसिंचन प्रकल्पालाही पथकाने भेट दिली. प्रकल्पातील घटलेल्या पाणीपातळीची स्थिती जाणून घेतली.

पथकाने आत्महत्याग्रस्त शेतकऱ्याच्या कुटुंबीयांची भेट घेऊन त्यांच्या व्यथा जाणून घेतल्या. केंद्रीय पथकाकडून अहवाल तयार करून केंद्र सरकारला सादर करण्यात येणार आहे.

दौऱ्यात केंद्रीय पथकासोबत जिल्हाधिकारी विकास मीना व अन्य संबंधित अधिकारी, कर्मचारी उपस्थित होते.

#दुष्काळ

#शेतकरी

#FarmerWelfare

Search This Blog

जिल्हा माहिती कार्यालय, वाशिम

Comments

Post a Comment

Popular posts from this blog

जिल्हा रुग्णालयात पुरुष नसबंदी पंधरवाडा साजरा

मतदान ओळखपत्राला पर्यायी ११ कागदपत्रांची यादी जाहीर