सेवा संकल्प अभियानातून ग्रामीण महिला उद्योजकतेला उमेदची चालना! राज्य समन्वयक सागर गायकवाड यांच्याकडून वाशिम जिल्ह्यातील विविध महिला उद्योगांची पाहणी; उत्पादनवाढ, बाजारपेठेशी जोडणी आणि आर्थिक स्वावलंबनावर भर

🌱 सेवा संकल्प अभियानातून ग्रामीण महिला उद्योजकतेला उमेदची चालना!

राज्य समन्वयक सागर गायकवाड यांच्याकडून वाशिम जिल्ह्यातील विविध महिला उद्योगांची पाहणी; उत्पादनवाढ, बाजारपेठेशी जोडणी आणि आर्थिक स्वावलंबनावर भर

📍 *वाशिम, दि. १४ ऑक्टोबर (जिमाका)*

सेवा संकल्प अभियानांतर्गत ग्रामीण महिलांच्या उद्योग-व्यवसायांना प्रोत्साहन देण्यासाठी उमेद–महाराष्ट्र राज्य ग्रामीण जीवनोन्नती अभियानाचे राज्य समन्वयक सागर गायकवाड यांनी नुकतीच वाशिम जिल्ह्यातील महिला उद्योजकांच्या उपक्रमांची पाहणी करून उत्पादनवाढ, बाजारपेठेशी जोडणी आणि आर्थिक स्वावलंबनाबाबत मार्गदर्शन केले.

🔹 **महिला उद्योजकतेच्या विविध उपक्रमांची पाहणी**

प्रकल्प संचालक किरण कोवे यांनी जिल्ह्यातील उमेद अभियानाच्या कामकाजाची माहिती दिली. वाशिम तालुक्यातील सुकळी येथे चिया उत्पादन युनिट आणि कॉर्पोरेट सामाजिक उत्तरदायित्वांतर्गत उपलब्ध करून दिलेल्या फिरत्या विक्री वाहनाची पाहणी करण्यात आली.

मालेगाव तालुक्यातील शिरपूर येथे कुक्कुटपालन व शेळीपालन या एकत्रित व्यवसायाची पाहणी करण्यात आली. तसेच शिलाई मशीन व कापूर उत्पादन युनिटचे उद्घाटन करण्यात आले. मंगरूळपीर तालुक्यातील आसेगाव येथे द्रोणपत्रावळी निर्मिती युनिट, तर मानोरा तालुक्यातील गिरोली येथे महिला शेतकरी उत्पादक कंपनीचे कृषी केंद्र, हॅचरी युनिट व कार्यालयाची पाहणी करण्यात आली. या वेळी व्यवसाय व्यवस्थापन, उत्पादनवाढ आणि बाजारपेठेच्या संधींबाबत चर्चा झाली.

🌾 **दुष्काळी परिस्थितीत पर्यायी उत्पन्नाच्या साधनांना प्रोत्साहन**

दुष्काळी परिस्थितीत ग्रामीण कुटुंबांना उत्पन्नाचे पर्यायी साधन उपलब्ध व्हावे, यासाठी इच्छुक महिलांना अभियानांतर्गत उपलब्ध निधीचा लाभ देऊन उद्योग सुरू करण्यास प्रोत्साहित करण्याच्या सूचना देण्यात आल्या. स्वयंसहायता गटांच्या माध्यमातून महिलांचे उद्योग बळकट करून रोजगारनिर्मिती व शाश्वत उपजीविकेच्या संधी वाढविण्यावर भर देण्यात आला.

🤝 **महिलांच्या आर्थिक स्वावलंबनासाठी उमेद अभियान कार्यरत**

मुख्य कार्यकारी अधिकारी, जिल्हा परिषद वाशिम आणि प्रकल्प संचालक, जिल्हा ग्रामीण विकास यंत्रणा यांच्या मार्गदर्शनाखाली उमेद अभियानाची यंत्रणा महिलांना आर्थिकदृष्ट्या स्वावलंबी व सामाजिकदृष्ट्या सक्षम करण्यासाठी कार्यरत असल्याचे जिल्हा अभियान व्यवस्थापक सुधीर खुजे यांनी यावेळी सांगितले.

महिला उद्योजकतेला बळ, ग्रामीण अर्थव्यवस्थेला चालना आणि स्वयंसहायता गटांच्या माध्यमातून शाश्वत रोजगारनिर्मिती, हेच उमेद अभियानाचे महत्त्वपूर्ण योगदान! 🌿

#सेवासंकल्पअभियान #उमेदअभियान #