देगाव शाळेतील बाधित विद्यार्थ्यांची सर्वोतपरी काळजी घेण्याच्या पालकमंत्र्यांच्या सूचना

 

·        पालकांनी काळजी न करण्याचे आवाहन

वाशिम दि. २५ : रिसोड तालुक्यातील देगाव येथील शाळेतील कोरोना बाधित आढळलेल्या सर्व २२९ विद्यार्थ्यांची सर्वोतोपरी काळजी घेवून त्यांना आवश्यक सुविधा तातडीने उपलब्ध करून देण्याच्या सूचना पालकमंत्री शंभूराज देसाई यांनी जिल्हा प्रशासनाला केल्या आहेत. पालकमंत्र्यांनी जिल्हाधिकारी षण्मुगराजन एस. यांच्याकडून दूरध्वनीद्वारे कोरोना बाधित विद्यार्थ्यांच्या प्रकृतीबाबत माहिती जाणून घेतली. तसेच सर्व विद्यार्थ्यांची प्रकृती स्थिर असून त्यांना कोरोनाची कोणतीही गंभीर लक्षणे नाहीत, त्यामुळे पालकांनी काळजी करू नये, असे आवाहन त्यांनी केले.

देगाव येथील निवासी शाळेतील ४ शिक्षक, शिक्षकेतर कर्मचारी आणि वसतिगृहात राहणारे २२९ विद्यार्थी कोरोना बाधित आले आहेत. या विद्यार्थ्यांना सर्व आरोग्य विषयक सुविधा उपलब्ध करून द्याव्यात. याठिकाणी डॉक्टरांचे पथक, रुग्णवाहिका उपलब्ध ठेवावी. विद्यार्थ्यांची कोणत्याही प्रकारे गैरसोय होणार नाही, याची दक्षता घ्यावी. एखाद्या विद्यार्थाला काही मध्यम अथवा गंभीर लक्षणे दिसल्यास त्याला तातडीने रुग्णालयात दाखल करावे. या विद्यार्थ्यांची काळजी घेवून ते लवकरात लवकर या संसर्गातून बाहेर येतील, यासाठी प्रयत्न करण्याच्या सूचना पालकमंत्र्यांनी जिल्हाधिकाऱ्यांना दिल्या आहेत.

बाधित विद्यार्थ्यांमध्ये अमरावती जिल्ह्यातील १५१, यवतमाळ जिल्ह्यातील ५५, वाशिम जिल्ह्यातील ११, बुलडाणा जिल्ह्यातील ३, अकोला जिल्ह्यातील १, हिंगोली जिल्ह्यातील ८ विद्यार्थ्यांचा समावेश आहे. सर्व बाधित विद्यार्थ्यांची प्रकृती स्थिर असून त्यांना कोरोनाची कोणतीही गंभीर लक्षणे नाहीत. जिल्हा प्रशासन व आरोग्य विभाग विद्यार्थ्यांची काळजी घेत असून सर्वांना आरोग्य सुविधा, योग्य आहार यासह इतर सुविधा उपलब्ध करून देण्यात आल्या आहेत. सर्व विद्यार्थी लवकरच या संसर्गातून बाहेर येतील. त्यामुळे या विद्यार्थ्यांच्या पालकांनी कोणतीही काळजी करू नये, असे आवाहन पालकमंत्री शंभूराज देसाई यांनी केले आहे. पालकमंत्री श्री. देसाई जिल्हाधिकाऱ्यांच्या संपर्कात असून परिस्थितीवर लक्ष ठेवून आहेत.

*****