🌾 आता खताची माहिती घरबसल्या! 📱१५ ऑगस्टपासून वाशिम जिल्ह्यात मोबाईल ॲपद्वारे खत वितरणाचा पथदर्शी प्रकल्पखतासाठी रांगेत उभे राहण्याची गरज कमी होणार; उपलब्धता पाहून घरबसल्या बुकिंगची सुविधा !

🌾 आता खताची माहिती घरबसल्या! 📱

१५ ऑगस्टपासून वाशिम जिल्ह्यात मोबाईल ॲपद्वारे खत वितरणाचा पथदर्शी प्रकल्प

खतासाठी रांगेत उभे राहण्याची गरज कमी होणार; उपलब्धता पाहून घरबसल्या बुकिंगची सुविधा!

वाशिम जिल्ह्यात खत वितरण अधिक सुलभ, पारदर्शक आणि शेतकरीभिमुख करण्यासाठी ‘खत विक्रीसाठी आराखडा’ हा पथदर्शी प्रकल्प १५ ऑगस्ट २०२६ पासून सुरू होत आहे.

या प्रणालीद्वारे शेतकऱ्यांना मोबाईल ॲपच्या माध्यमातून अनुदानित खताची उपलब्धता पाहणे, खताची नोंदणी व बुकिंग करणे आणि निवडलेल्या कृषी सेवा केंद्रातून खताची उचल करणे शक्य होणार आहे.

📱 घरबसल्या पाहा खताची उपलब्धता

शेतकऱ्यांना आपल्या पसंतीच्या कृषी सेवा केंद्रावर कोणते खत उपलब्ध आहे, किती साठा आहे आणि विक्रेता किती अंतरावर आहे, याची माहिती ॲपवर मिळणार आहे.

खत बुक केल्यानंतर क्यूआर संकेतांक व टोकन क्रमांक तयार होईल. बुक केलेले खत तीन दिवस संबंधित शेतकऱ्याच्या नावावर राखीव राहणार आहे. या कालावधीत शेतकरी आपल्या सोयीने कृषी सेवा केंद्रावर जाऊन क्यूआर संकेतांक दाखवून खताची उचल करू शकतो.

🌱 अशी असेल खत खरेदीची प्रक्रिया

➡️ मोबाईलमध्ये ॲप उघडून राज्याची निवड करावी.

➡️ अॅग्रीस्टॅकचा शेतकरी ओळख क्रमांक किंवा आधार क्रमांक प्रविष्ट करून भ्रमणध्वनीवरील एकवेळच्या संकेतांकाद्वारे पडताळणी करावी.

➡️ स्वतःची, भाडेतत्त्वावरील किंवा संयुक्त मालकीची जमीन निवडून जिल्हा, तालुका, गाव व गट क्रमांकाची माहिती भरावी.

➡️ हंगाम व लागवड केलेले पीक निवडल्यानंतर पिकानुसार खताची शिफारस पाहता येईल.

➡️ आवश्यक खत, प्रमाण व गोण्यांची संख्या निवडावी.

➡️ उपलब्ध साठा आणि अंतर पाहून जवळील योग्य खत विक्रेता निवडावा.

➡️ अर्ज सादर केल्यानंतर तयार झालेला क्यूआर संकेतांक जतन करावा.

➡️ निवडलेल्या विक्रेत्याकडे क्यूआर संकेतांक दाखवून खताची उचल करावी.

⚖️ अनुदानित खताच्या समन्यायी वितरणाला मदत

शेतकऱ्याने खरेदी केलेल्या प्रत्येक अनुदानित खताच्या गोणीची नोंद प्रणालीमध्ये राहणार आहे. त्यामुळे अनुदानित खताचे समन्यायी वितरण होण्यास मदत होणार असून गैरवापराला आळा घालणे शक्य होणार आहे.

👨‍🌾 शेतकऱ्यांनी शेतकरी ओळख क्रमांक तयार करून घ्यावा

ॲपमध्ये आधार क्रमांकाद्वारेही प्रवेश करता येणार असला तरी प्रणालीचा सुरळीत वापर करण्यासाठी अॅग्रीस्टॅकचा शेतकरी ओळख क्रमांक असणे अधिक सोयीचे व प्राधान्याचे आहे.

ज्या शेतकऱ्यांनी अद्याप शेतकरी ओळख क्रमांक तयार केलेला नाही, त्यांनी तो लवकरात लवकर तयार करून घ्यावा. तसेच जमिनीची माहिती अद्ययावत ठेवावी.

📢 जिल्हाधिकारी योगेश कुंभेजकर यांचे निर्देश

या पथदर्शी प्रकल्पाची माहिती गावपातळीपर्यंत पोहोचवून जास्तीत जास्त शेतकऱ्यांना ॲपच्या वापराबाबत मार्गदर्शन करावे, असे निर्देश जिल्हाधिकारी योगेश कुंभेजकर यांनी प्रशासनाला दिले आहेत.

प्रकल्पाच्या प्रभावी अंमलबजावणीसाठी तहसीलदार, गट विकास अधिकारी, तालुका कृषी अधिकारी, सहाय्यक निबंधक तसेच कृषी सहाय्यक, ग्राम महसूल अधिकारी, ग्रामपंचायत अधिकारी, कृषी मित्र, कृषी सखी आणि कृषी तंत्रज्ञान व्यवस्थापक यांच्यामार्फत शेतकऱ्यांना मार्गदर्शन करण्यात येणार आहे.

📌 खताची उपलब्धता जाणून घ्या | घरबसल्या बुकिंग करा | तीन दिवसांत खताची उचल करा

#खतवितरण #खतबुकिंग #शेतकरी #वाशिम #मोबाईलॲप #पथदर्शीप्रकल्प #अॅग्रीस्टॅक #शेतकरीओळखक्रमांक #कृषी #अनुदानितखत #शेतकरीसुविधा #पारदर्शकखतवितरण #डिजिटलशेती #जिल्हामाहितीकार्यालयवाशिम